వ్యవసాయ బిల్లుల నేపథ్యంలో ఎన్డీఏతో తెగదెంపులు చేసుకుంది శిరోమణి అకాలీదళ్. పార్టీ కోర్ కమిటీ సమావేశం అనంతరం ఈ విషయాన్ని వెల్లడించారు అకాలీదళ్ అధ్యక్షుడు సుఖ్బీర్ సింగ్ బాదల్.
"అత్యవసరంగా జరిగిన సమావేశంలో.. భాజపా నేతృత్వంలోని ఎన్డీఏ నుంచి తప్పుకోవాలని శిరోమణి అకాలీదళ్ నేతలు ఎకగ్రీవంగా నిర్ణయించారు."
--- సుఖ్బీర్ బాదల్, అకాలీదళ్ అధ్యక్షుడు.
వ్యవసాయ బిల్లుల విషయంలో ప్రభుత్వ వైఖరి మారకపోవడం వల్ల కూటమి నుంచి బయటకు వచ్చినట్టు సుఖ్బీర్ పేర్కొన్నారు. పంజాబీ, సిక్కులకు సంబంధించిన ఇతర అంశాలు కూడా ఇందుకు కారణమన్నారు. పార్టీ కార్యకర్తలు, రైతులను సంప్రదించిన అనంతరం ఈ నిర్ణయం తీసుకున్నట్టు వివరించారు.
కేంద్రం తీసుకొచ్చిన మూడు వ్యవసాయ బిల్లులు.. చిరకాల మిత్రపక్షాలైన శిరోమణి అకాలీదళ్, భాజపా మధ్య అభిప్రాయబేధాలకు కారణమయ్యాయి. ఈ బిల్లులను వ్యతిరేకిస్తూ అకాలీదళ్ ఎంపీ హర్సిమ్రత్ కౌర్ ఇప్పటికే తన మంత్రి పదవికి రాజీనామా చేశారు. ఈ బిల్లుల వల్ల రైతులు తీవ్రంగా నష్టపోతారని సుఖ్బీర్ ఆవేదన వ్యక్తం చేశారు.
